الكومنت والشير

خلونا نقول مرة تانية ان الكومنت والشير لصور وفيديوهات وأخبار شنيعة فيها قتل وتعذيب وحوادث، لا يعود عليك بأي فائدة ولا للشخص الـ بيقرأ البوست ولا لأي حد، بل بيضرك ضرر نفسي كبير جدا وبتساعد في نشر الكآبة والخوف والعنف في الكوكب حتى لو نيتك خير أو عندك ألف مبرر.

العالم به ما يكفي من العنف وأشياء غير مرغوب فيها كلنا عارفينها مش محتاجين حد يفكرنا بيها.

مش محتاجين نحارب الحرب ولا نحارب الفساد ولا نحارب التحرش ولا الإدمان، لأن ده في الواقع بيزود كل الحاجات دي وبيشحنها أضعاف قوتها شئت أم أبيت، والطريقة دي أثبتت فشلها على مر القرون. عقلك اللا واعي لا يفهم شيئا بالنفي، اذا قلت لك لا تتخيل سيارة حمراء وتقودها قطة سوداء، فقد تخيلتها بالفعل، ونفس الشيء يحدث على مستوى الوعي الجمعي عندما نردد "لا للإرهاب" لا لكذا لا لكذا محاربة كذا .. فإننا نستمر في نفس دائرة المشكلة والصراع.

ومش معنى كدة اننا نتجاهل المشاكل دي ونقول الحياة وردي.

بل محتاجين نركز على الحلول والمشاعر والأفكار المرغوبة ونبدأ ننشرها. محتاجين نتعلم طرق جديدة في التفكير بداية مع أنفسنا. جربت تركز على ما تريد؟

جرب تركز ع السلام والحب والتطور التكنولوجي والنفسي والفكري والجسدي وأي شيء ترغب برؤيته يزداد في العالم، ابدأ لاحظه وركز عليه وفكر فيه واقرأ عنه وأد دورك وافعل ما بوسعك، ثم شاهد ما يحدث حولك؛ شاهد أفكارك وأفعالك الجميلة تزدهر وتؤثر في محيطك تدريجيا كتأثير الفراشة.

وتذكر انك مش مسؤول تغير العالم ولا مطلوب منك تحكم ع الناس وتصنفهم لأنك للأسف مش إله ومهما عرفت هتفضل مش عارف حاجة.

تقبل انك مش عارف حاجة، اعرف ايه ال في ايدك واختار تأدي دورك واتعلم الفنون والعلوم الـ تساعدك تعيش حياتك بالطريقة الـ تناسبك ببساطة واستمتاع