الوعي المكاني

الوعي المكاني

جربت تعدي ف الشارع من ممر ضيق وتلاقي واحدة واقفة قدامك ماسكة التليفون سدة الممر تماما ومندمجة في الحديث الشيق؟ جربت تنده عليها 3 مرات لحد ما تضطر تخبط على كتفها عشان تاخد بالها أخيرا انها سدة الممر وفي كائنات غلابة مستنيينها؟؟

جربتي تقعدي في مترو أو ميكروباص وجنبك كائن فاتح رجليه على مصراعيها واخد مساحة 3 أفراد مع ان وزنه طبيعي وعنده مساحة كافية؟

وأكيد كلنا جربنا نقف في الإشارة الخضرا ورا عربية متحركتش لمجرد ان فيها كائن بيرد ع الواتس ... ومن وقت للتاني أكيد في موقف ما كنت انت أو أنا أحد تلك الكائنات الظريفة 

الموضوع الـ هتكلم فيه برأيي مهم جدا ونادرا لما حد بيتكلم فيه برغم اننا بنواجهه يوميا ... وهسميه "بالوعي المكاني"

الوعي المكاني هو ببساطة انك تكون واخد بالك وواعي بالـ بيحصل حواليك، خاصة في المواقف الـ فيها احتكاك في أماكن عامة. الوعي المكاني لما يكون موجود بيريحك وبيحميك من حاجات كتير وبيدي انطباع بالاحترام للكائنات الزميلة. ولما يغيب بيكون من المواقف المستفزة وبيدي انطباع بالبلاهة وعدم الاحترام وممكن كمان يعرض حياتك للخطر!

بعض فوائد الوعي المكاني:
-الاحساس المتبادل بالاحترام والتواصل والثقة مع الناس
-الحماية من النشل والسرقة والتحرش (بالذات للبنات) - في الغالب النشالين والمتحرشين بيختاروا الشخص الـ باين عليه انه في اللالا لاند
-الحماية من الحوادث (والشتيمة أحيانا) أثناء القيادة
-الحماية من الناس الـ بتنط في الطوابير أو تلزق فيك ف بوابة المترو ويعملوا من بنها (مع الاعتذار لأهالي بنها)

بعض أسباب "اللاوعي" المكاني:
-الأنانية وعدم وضع أي اعتبار للآخرين
-استخدام الموبايلات باستمرار والنظر في الشاشات وتعلية الصوت في السماعات بداعي أو بدون
-كثرة التشتيت والمالتي تاسكينج والتفكير في 50 موضوع بنفس اللحظة

بعض المقترحات لزيادة الوعي المكاني:
-ممارسة التأمل بشكل يومي لتصفية الذهن وزيادة التركيز في اللحظة الحاضرة
-تنظيم وقتك والتفكير في شيء واحد في الوقت الواحد قدر الإمكان
"One thing at a time"
-بعض الهوايات والرياضات مثل التصوير وركوب الدراجات والرياضات الحركية تزيد الوعي المكاني بشكل عام

ملحوظة:
كل المذكور ده عشان انت تطبقه مع نفسك وتستفيد به، وليس الهدف التركيز مع الآخرين ونقدهم وإلا مش هنبقى حلينا حاجة  في مواقف مع الناس ممكن تكون مش مستاهلة والأفضل انك تعديها، وفي مواقف لازم توقف الشخص وتاخد حقك، وفي الحالتين الأفضل انك تكون مشاعرك محايدة قدر الإمكان وصافي من جوا، لأنك لو ركزت مع أخطاء الناس ونقدهم أكتر حد هيتعب هو انت! أشوفكم في المترو