خطورة الخوف

معظم الناس ما زالت مش مدركة خطورة مشاعر الخوف وأثرها في انتشار المرض وإضعاف المناعة. الناس بتعتقد ان الموضوع مالهوش أهمية كبيرة أو حاجة على جنب كده والأهم اننا نبعد عن بعض ونهتم بالمطهرات والكمامات وخلاص، لكن الحقيقة إن تأثير الأفكار والمشاعر على الصحة والمرض أهم بكتير.

عقلك اللاواعي بيستجيب لأي فكرة بتصدقها، ولو كانت الفكرة دي مصحوبة بمشاعر الجسم بيستجيب ليها بسرعة جدا وتبدأ تكون جزء من النظام بتاعك. يعني لو قاعد طول اليوم تقرأ وتسمع أخبار عن عدد الحالات والناس الـ بتموت والمرض ليه أعراض معينة، ومعندكش الوعي الكافي انك تقدر تفصل مشاعرك وبسهولة جدا بتدخل جوا نفس مشاعر الخوف وتفضل تعمل شير وتنشر حواليك الخوف الـ أصبح مليان جواك، سهل جدا جسمك يستجيب لنفس الأعراض وتبدأ تحس بيها والموضوع يتطور (حتى لو مفيش فيرس فعلي انتقل لك). في ملايين الأبحاث الـ اتعملت على فكرة البلاسيبو أو التأثير الوهمي، الـ هو في الحقيقة حقيقي مش وهمي. زي مثلا تجربة اتعملت في قناة نات جيو عن مجموعة شباب جمعوهم في بار وقالولهم في نوع خمور جديد عايزين نجربه ونشوف تأثيره عليكم، وفي الحقيقة هو مكانش فيه أي نسبة كحول أو حاجة تذهب العقل لكن أصحاب التجربة أقنعوا الشباب انه نوع جديد تأثيره قوي. والشباب بالفعل استجابوا وبعد شوية بدأوا يتطوحوا ويهبلوا ويقولوا كلام مالهوش معنى وكل علامات الهذيان تظهر عليهم! وبعد انتهاء التجربة لما عرفوا انه كان مجرد مشروب عادي مكانوش مصدقين وقعدوا ينكروا ويقولوا لا أكيد في حاجة غلط 

وتجارب تانية كتير جدا ممكن تبحثوا عنها زي الراجل الـ كان محكوم عليه بالإعدام وأقنعوه إن جهاز هيموته بطريقة معينة وفي الحقيقة الجهاز مكانش بيعمل أي حاجة لكن الراجل مات لأنه صدق الفكرة!!! الموضوع خطير والله يا أصدقائي وأخطر مما تتخيلوا. الأخبار المرعبة المفتوحة في التلفزيون 24 ساعة والـ بتشيروها طول الوقت ع الفيس محملة بمشاعر خوف ورعب ومرض أخطر من أي فيرس حقيقي. الاهتمام بالتنظيف والتطهير والحماية والتباعد وانت من جوا مرعوب وخايف ومش متزن، بالطريقة دي ممكن يضرك أكتر ما يفيدك!

الفيرس هيختفي لما نركز على الصحة والحب ورفع المناعة، ونفضل نتكلم كتير عن الصحة ونمارس رياضة وناكل أكل صحي ونشجع بعض على ده، ونتكلم ونطبق ده من منطلق حب مش منطلق خوف. الشر والمرض والخوف والضعف مش بيختفي بمقاومته ومحاربته، بل المقاومة بتزود أي حاجة. طبيعي انك تكون حذر وتاخد احتياطاتك، بس الدافع بتاعك والطاقة الـ بتحركك تكون نابعة من حب ووعي مش خوف وهروب، وتركيزك يكون على الصحة والتطور والوعي والحب وأي حاجة انت عايز تركز عليها هتكون هي الواقع بتاعك .. وأي حاجة هنركز عليها مع بعض كمجتمع هتكون هي الواقع الجديد بتاعنا ...

ثَبِّت دولتك في مركز التَّاو
وسوف يفقد الشر قواه
ليس لأنه قد اختفى
بل لأنك خرجت من طريقه

دع الشر بدون أعداء
وسوف يتلاشى من تلقاء ذاته

#منهج_الاستنارة
#تاو_تي_تشينج
#طريق_الاستنارة

انتظروني الليلة 7 مساء بتوقيت مصر 8 بتوقيت السعودية في فيديو مباشر على الانستجرام هنكمل كلامنا 
@Maisaralife_Meditations